شعر / إيمان مصطفى
انا القلب اللى دابت كل
أحزانه من التكرار
ليلاتى نهار
و باستمرار
ولا تهدى عواصف جرح
مليانه عذاب ومرار
ومتحلى بأناتى..
وأهاتى..
اللى مسحوبه بموج غدار
وغرقانه
ملامح فرحى مش باينه
وباينه منى ترنيمة هوا صَابْحه
بتشفعلى وبتحايل..
قدر قادر..
مفيش منه ولا مخرج
ولا حتى دقيقه فرار
وهدهد قلبى تفكيرُه
وطاير طيُره..
ونادا ملايكة الأحلام
أمرها والقمر ظاهر
بتوب طاهر
تصاحبنى..
وتصحبنى
ليلاتى ويا نجماتى
وتهدينا فرح طارح
وطرحُه لما شافه الحلم..
قام صلى تلت ركعات
وسبح بسم معبُودُه
وقام تانى شكر جوده
وراح بَانى
قلاع من ود ربانى
وحصنها بلا أسوار
ومن يومها
أنا والحلم والذكرى
وأحزانى
فى صوره شكلها تانى
ولا يمكن
على بال الزمن تٌختُر
يامحلاها
ومَحْلانى
قصايد ..
من بيوت كامله..
بلا أحبار
